Flug til Alicante með Icelandair, verð frá 41.625 kr.*

Hvers má vænta á Alicante?

Hafnarborgin Alicante liggur að Miðjarðarhafi og tilheyrir strandlengjunni Costa Blanca, „hvítu ströndinni“.

Borgin býður allt sem þarf fyrir rólegt frí: hlýtt og milt veður, stærðarinnar strandsvæði, afþreyingu fyrir alla aldurshópa, náttúrufegurð Miðjarðarhafsins, sýnilega sögu og fjölbreytilega menningu. Hvað þarf maður meira?

Héðan er stutt í Benidorm og marga aðra huggulega sumarleyfisstaði og stórborgin Valencia er í 90 mínútna akstursfjarlægð.

Með Icelandair VITA er hægt að bóka pakkaferð til Alicante, Benidorm, Albir eða Calpe. Kynntu þér góða gistimöguleika og fjölbreytta afþreyingu á svæðinu og njóttu þess að hlakka til!

Samgöngur á Alicante

Borgin Alicante er tiltölulega lítil og hún er byggð á flatlendi, svo auðvelt er að komast leiðar sinnar fótgangandi.

Á göngutúr um borgina gefst þér líka færi á að staldra við og upplifa anda bæjarins.

Að því sögðu, þá eru ýmsar leiðir færar fyrir lengri ferðalög. Hér standa til boða strætisvagnar, sporvagnar og leigubílar.

Ef þig langar í ferðalag út fyrir bæinn er hægt að leigja bíl, umferðin er fremur lágstemmd og nóg er af bílastæðum víðast hvar.

Besti tíminn til að fljúga til Alicante

Alicante iðar af lífi allt árið um kring og þökk sé staðsetningu bæjarins við strendur Miðjarðarhafsins, er hitastigið þægilegt mestallt árið. Jafnvel að vetri til gengur fólk um á stuttbuxum.

Ef þig þyrstir í sólina er tímabilið frá júní fram í september best. Þá eru fæst ský á himni og hitinn meiri. Á móti kemur að þessi sami tími er auðvitað líka háannatími ferðamennskunnar.

Ef þú vilt sleppa við mesta ferðamannafjöldann yfir sumarmánuðina, og þú setur örlítið kaldara loftslag ekki fyrir þig, gæti verið best fyrir þig að heimsækja Alicente frá nóvember fram í apríl. Þá er líka ódýrara flug og gisting í boði.

Afþreying á Alicante

Alicante býður upp á alla þá afþreyingu sem þarf í frí fyrir fjölskylduna: blak og busl á strandsvæðinu, fjölda golfvalla með útsýni yfir Miðjarðarhafið og tækifæri til hvers kyns íþróttaiðkunar. Svo ekki sé talað um skemmtigarða á borð við vatnsrennibrautagarðinn Aqualandia og ævintýragarðinn Terra Mítica.

Í hinni aldagömlu borg Alicante er líka margt sem gleður augað. Það er kjörið að kíkja inn í gamla bæinn að kvöldi til, þá sérstaklega á aðaltorgið Plaza de San Cristobal, þar sem getur að líta byggingarlist barokktímabilsins í allri sinni dýrð.

Annað einkennismerki borgarinnar, virkið Castillo de Santa Bárbara, gnæfir tignarlega yfir byggðinni á toppi fjallsins Benancantil.

Rætur virkisins ná allt aftur til níundu aldar og þaðan gefst gott útsýni yfir Alicante og út á fagurblátt Miðjarðarhafið.

Matarmenning á Alicante

Uppistaðan í hefðbundinni matarmenningu íbúa Alicante er, eins og gefur að skilja í hafnarborg, sjávarfang.

Hrísgrjón eru ekki síður í hávegum höfð og hér eru þau ekki notuð sem uppfylling í máltíðina heldur er rík áhersla lögð á nákvæmlega hvernig þau eru matreidd. Arroz a banda er ekki sama og arroz con costra!

Á Alicante er líka hefð fyrir sætindum af ýmsu tagi. Vinsælasta sælgætið á svæðinu er hið svonefnda Turrón de Jijona, núggat blandað möndlum og hunangi, en þetta gotterí tengja íbúar Alicante við jólahátíðina.

Út frá aðalgöngugötu bæjarins, Explanada de España, má finna fjöldamörg veitingahús, en gamli bærinn í heild sinni býður upp á fjölbreytilegt úrval kræsinga og gönguferð um sagnaríkasta svæði borgarinnar fylgir í kaupbæti.

Menningarlífið á Alicante

Alicante er sérstaklega lífleg á sumrin, þegar ýmis konar listviðburðir og fjörugir götulistamenn auðga mannlífið.

Þar ber sérstaklega að nefna Noche de San Juan, eða Jónsmessu, þann 24. júní ár hvert, þegar tendrað er í brennum, að sögn til að reka burt illa anda.

Þeim sem heimsækja borgina gefst líka kostur á að kynna sér menningar- og listasögu svæðisins í söfnum á borð við MARQ Museo Arqueologico de Alicante og Museu de Belles Arts Gravina.

Svo er hægt að skella sér í dagsferð út til eyjarinnar Tabarca, sem býður upp á þægilegt strandlíf og fagurt náttúrulíf.

Árið 1986 varð eyjan yfirlýst verndarsvæði fyrir sjávardýr. Þess vegna er Tabarca líka kjörinn staður til að snorkla og kanna litbrigði undirdjúpanna.