Flug með Icelandair til Amsterdam frá 41.115 kr.*

Amsterdam í hnotskurn

Ferðalangurinn þarf ekki að ganga langt út af aðallestarstöðinni við höfnina í miðborg Amsterdam, áður en hann fer að finna fyrir sögulegum anda staðarins.

Gullöld hollendinga, sautjánda öldin, lifir góðu lífi í byggingarstíl og skipulagi miðborgarinnar, með sín háu, mjóu hús og breiðu síki.

En menningarlíf borgarinnar er afar fjölbreytilegt og einskorðast ekki við forna frægð. Á hinum fjölmörgu tónleikastöðum borgarinnar má heyra marga færustu tónlistarmenn Evrópu leika jazz, raftónlist, klassík, rokk og ótal margt fleira.

Þá er um að gera að líta við á hefðbundinni hollenskri krá, hinum svonefndu bruin cafés, og skoða mannlífið í kringum síkin, slást svo í hóp með heimamönnum á gönguferð um Vondelpark í hjarta borgarinnar.

Með Icelandair VITA er hægt að bóka pakkaferð til Amsterdam.

Samgöngur í Amsterdam

Vinsælt er að ferðast um borgina á hjóli. Ferðamenn geta leigt hjól fyrir um 10 evrur á dag. Miðbæjarins er kannski best notið á röltinu.

Borgin státar af prýðis almenningssamgöngukerfi. Einn þægilegur kostur er að kaupa sérstakan ferðapassa sem heitir OV-chipkaart. Þú getur bætt inneign á kortið og notað það til að ferðast með sporvögnum, strætisvögnum, neðanjarðarlestum og ferjum.

Kortið gildir í allt að 5 ár – ef þú skyldir vera á höttunum eftir afsökun til að heimsækja borgina aftur síðar!

Það getur verið erfitt að finna bílastæði í Amsterdam. Við mælum með göngu, hjólreiðum eða almenningssamgöngum frekar en bílaleigu.

Museumplein

Museumplein, eða torg safnanna, er almenningsreitur í hjarta borgarinnar og eins og nafnið gefur til kynna er hann umkringdur söfnum.

Rijksmuseum er ríkissafn Hollands á sviði lista, og sýningar þess spanna allt frá listsköpun miðalda til nútímalistar. Hér eru verk eftir marga heimsþekkta málara, þar á meðal Rembrandt og Vermeer.

Stedelijk er helsta nútímalistasafn borgarinnar. Hér má finna verk frá 20. og 21. öld eftir listamenn á borð við Vincent van Gogh, Marc Chagall og Jackson Pollock.

Á Van Gogh safninu er til sýnis einstakt safn málverka, teikninga og bréfa listamannsins. Hvergi fyrirfinnst stærra safn verka eftir þennan mikla brautryðjanda.

Markaðir í Amsterdam

Amsterdam er staðurinn fyrir þau sem njóta sín í markaðsrápi.

Waterlooplein Markt toppar alla aðra flóamarkaði, en í Amsterdam eru einnig hverfismarkaðir sem eru tileinkaðir antíkmunum, list og gömlum bókum.

Albert Cuypmarkt er stærsti og vinsælasti útimarkaður Amsterdam. Hér er sannkallaður suðupottur krydda og lita frá öllum heimshornum.

Einstök angan leikur um vitin á blómamarkaðinum Bloemenmarkt, Við getum auðvitað ekki skrifað um Amsterdam án þess að minnast á stað þar sem hægt er að sjá túlípana!

Lostæti í Amsterdam

Vlaamse frieten eru kannski það besta við Amsterdam: heitar, stökkar franskar þaktar mæjónesi. Njóttu þeirra með ísköldum biertje á krá út við síkin og kannaðu mannlífið.

Markaðirnir eru einnig með sérstakt aðdráttarafl: Hollendingar kunna skil á góðum osti og nokkrir bæir í Hollandi eru frægir fyrir þá til dæmis Gouda og Edam.

Þú átt eftir að annað hvort elska eða hata hráu síldina, sem er einn af einkennisréttum Hollands.

Svo ber að nefna nokkuð óvenjulegan rétt sem tíðkast í Hollandi, rijsttafel (indónesískt tapas), sem á rætur sínar að rekja til nýlendutímabils Hollendinga.

Hvar eru bestu bitarnir?

Þeim sem vilja kynnast hollenskri matargerð er bent á veitingastaðinn Haesje Claes, þar sem lagt er upp með hefðbundnar hollenskar máltíðir og hreinræktað hollenskt andrúmsloft.

Kíktu við í Foodhallen sem er staðsett í enduruppgerðri sporvagnastöð og smakkaðu á bitterballen (bragðgóð, lítil króketta fyllt með kjöti).

Svo er ekki úr vegi að líta við á Albert Cuypmarkt götumarkaðinum, versla og kannski bragða á hrárri síld og öðru hollensku góðgæti!