Flug með Icelandair til Boston frá 65.315 kr.*

Upplifðu söguna í Boston

Fyrir nokkrum öldum breyttu pólitískar vendingar í Boston gangi sögunnar. Byltingarsinnar hófu að kljúfa sig frá nýlenduvaldhöfum og hófu þar vegferð sem endaði með sjálfstæði Bandaríkjanna.

Flest helstu kennileiti borgarinnar er að finna í fegurstu hverfum hennar. Þannig er hægt að fræðast um frelsisstríð Bandaríkjanna og njóta fegurðar miðborgarinnar á einum og sama göngutúrnum.

Eins og menningarborg sæmir eru mörg áhugaverð söfn, almenningsgarðar og stofnanir í Boston með sterkar tengingar við fortíðina. Heimsæktu heimkynni eins frægasta háskóla heims, Harvard-háskóla, þar sem ófáir sögufrægir hugsuðir og uppfinningamenn hafa unnið sín stærstu afrek.

Með Icelandair VITA er hægt að bóka pakkaferð til Boston.

Hvað er við að vera í Boston?

Boston iðar af menningarlífi. Af nógu er að taka fyrir ferðalanga og engin leið að gera allt í einni heimsókn.

Allar leiðir liggja að frelsisslóðinni eða Freedom Trail. Þetta er um 4 km löng gönguleið sem leiðir þig um 16 söguleg kennileiti, allt frá Boston Common að Bunker Hill Monument.

Áhugafólk um íþróttir tekur gengi Red Sox í hafnarbolta mjög alvarlega, sem og gengi Patriots á ameríska fótboltavellinum. Því er tilvalið að hvetja Red Sox áfram með heimamönnum á leik á Fenway Park, sem er elsti hafnarboltavöllur landsins.

Margir segja að enginn megi yfirgefa Boston án þess að reka inn trýnið á The Isabella Stewart Gardner safninu í miðborginni. Þar má finna evrópska, asíska og ameríska list í glæsilegri byggingu sem minnir á byggingarlist Feneyja.

Verslað í Boston

Skólapeysa úr Harvard og derhúfa frá Red Sox? Þetta er það klassískasta, en enginn getur kvartað undan úrvali minjagripa í Boston.

Ef þú ert að feta þig eftir Freedom trail, er ekki slæm hugmynd að byrja á markaðstorginu bak við Faneuil Hall. Þar má finna sölubása, mat, götulistamenn og minnisvarða sögunnar við hvert fótmál.

Boston er höfuðborg bandrískrar sögu og bandarískra fræða og því er úrval bóka- og antíkverslana sérstaklega yfirgripsmikið. Newbury Street í Back Bay er frábær staður fyrir verslunarráf. Þar er að finna vönduð vörumerki og fínerí, en líka góða staði til að stoppa á og hlaða batteríin.

SoWa Art + Design District er staðsett meðal gömlu pakkhúsanna í South End – kíktu þangað til að skoða einstakt handverk, gallerí og nýtískuverslanir.

Matur í Boston

Sagan er víða í Boston og ekki síst á matborðinu. Elsta veitingastað Bandaríkjanna er að finna í Boston: Union Oyster House (frá 1826).

Sjávarfang er það eftirsóttasta út um allan bæ – þorskur, humar, ostrur og kúskeljar. Ljúffeng, matarmikil fiskisúpa er ofarlega á óskalistanum og Seaport District er besti staðurinn til að finna alls konar girnilega fiskrétti.

Í hverfinu North End er hin eina sanna litla Ítalía þar sem ekta pizza og pasta er framreitt og vínbarir og bakarí bjóða upp á ósvikna sneið af amerískum kúltúr.

Hægt er að seðja hungrið seint að kvöldi til í South End og nágrannahverfinu Chinatown. Í Cambridge eru margir vinsælir staðir, þar með taldir margir sem henta námsmönnum í leit að ódýrari valkostum og skemmtilegu næturlífi.

Besti tíminn til að heimsækja Boston

Ef þú ert á höttunum eftir aðeins lægra flugverði og ódýrari gistingu, og vilt kannski sleppa við mestu ferðamannaösina, eru mánuðirnir september og október fullkominn tími til að heimsækja Boston.

Veturinn í Boston er auðvitað kaldari og oft liggur snjóbreiða yfir borginni. Aftur á móti er jólahátíðin mögnuð á að líta. Ljósadýrðin er mikil og skreytingar langt fram úr hófi, víða má sjá börn á skautum og jólamarkaðir eru á hverju strái.

Ef þú heimsækir Boston í mars, máttu ekki láta hina árlegu göngu á degi heilags Patreks, eða Saint Patrick’s Day, fram hjá þér fara. Íbúar Boston urðu fyrstir Norður-Ameríkubúa til að halda þennan dag hátíðlegan og þeir kunna svo sannarlega að halda uppi fjörinu!

Samgöngur í Boston

Boston er stórborg og þó að þú getir auðveldlega ferðast innan hvers hverfis fyrir sig fótgangandi eða á hjóli, liggur beint við að nýta almenningsamgöngur til að ferðast milli bæjarhluta.

Ýmsar leiðir eru færar. Hop-On Hop-Off vagnar þræða alla helstu merkisstaði borgarinnar en þú getur líka ferðast með venjulegum strætó eða jafnvel um borð í báti.

Auðvelt er að nálgast leigubíla á götum borgarinnar.