Flug til Chicago með Icelandair, verð frá 71.415 kr.*

Menningarborgin Chicago

Chicago er þriðja stærsta borg Bandaríkjanna en lætur þó lítið fyrir sér fara – lífið í borginni gengur sinn vanagang í skugga stórborganna New York og Los Angeles.

Chicago á þó fyllilega skilið sinn skerf af sviðsljósinu, ekki síst vegna tónlistar- og íþróttalífsins, framlagi sínu til lista og menningar, frábærrar matargerðar og fjölbreytilegra hátíða sem fram fara í borginni.

Skýjakljúfarnir teygja sig hátt upp í himininn: Willis Tower er 108 hæðir og var hæsta bygging í heiminum í 25 ár. Ef þú þorir getur þú ferðast upp á 103. hæð turnsins, en hafðu í huga að gólfið er úr gleri!

Á jörðu niðri er list í almenningsrýminu eitt af sérkennum borgarinnar, þetta á sérsaklega við um Millennium Park. Þekktust er sennilega baunin glansandi, sem opinberlega heitir Cloud Gate, silkimjúkur og rennisléttur skúlptúr á besta stað í borginni.

Steinsnar frá finnur þú Art Institute of Chicago sem er annað stærsta listasafn Bandaríkjanna og þekkt fyrir ríkulegt safn af verkum impressjónista.

Samgöngur í Chicago

Chicago er stórborg og viðbúið að fæturnir verði ansi lúnir ef ferðamenn leita ekki aðstoðar samgöngutækja á einhverjum tímapunkti.

Leigubílar eru þægileg samgönguleið, sérstaklega um kalda vetur, en að sama skapi nokkuð dýr.

Nokkrar gerðir almannasamgangna á vegum Chicago Transit Authority (CTA) standa til boða. Það er ódýrt og fljótlegt að ferðast með strætisvagni eða lest milli borgarhluta.

Metra lestarkerfið býður upp á ferðir til nágrannaborga og -bæja. Metra starfrækir 11 línur, þar á meðal til og frá úthverfum borgarinnar.

Með Icelandair VITA er hægt að bóka pakkaferð til Chicago.

Ferðalög að sumri og vetri

Chicago er stundum uppnefnd “borg vindanna”, en auðvitað er árstíðamunur á veðurfari í borginni sem mikilvægt er að taka til greina þegar ferðin er skipulögð.

Heitasta og mildasta veðrið er yfir sumarmánuðina, frá júní og út ágúst.

Á sumrin er líka kjörinn tími til þess að slappa af við strönd Lake Michigan, eins Vatnanna miklu, eða út við Navy Pier, sem býður upp á fyrirtaks fjölskylduskemmtun og nóg af veitingastöðum. Þar eru líka haldnar flugeldasýningar tvisvar í viku yfir sumartímann.

Veturnir í Chicago eru aftur á móti afar kaldir. Frá nóvember fram í mars halda margir ferðamenn sig fjarri sökum kulda og hvassra vinda, þó heimamenn séu hvergi bangnir. Ef þú setur ekki fyrir þig kuldann, geturðu fengið bæði flugið og gistinguna á lægra verði.

Vor og haust í Chicago

Ef þú vilt forðast mesta mannfjöldann en engu að síður hafa veðrið milt og stillt, er öruggast að bóka flug til Chicago að vori eða hausti.

September og október bera með sér lægri hitastig og færri ferðamenn, en viðburðir eins og Chicago Oktoberfest og tónlistarhátíðir af ýmsu tagi, halda lífi í borginni á þessum árstíma.

Veðrið er líka almennt fremur milt í apríl og maí og ferðamannaösin talsvert minni en á sumrin, þó alltaf megi eiga von á hressilegri vorrigningu af og til.

Þrátt fyrir duttlunga árstíðanna, er Chicago ein mest heimsótta borg Bandaríkjanna og því er um að gera að bóka með góðum fyrirvara.

Matur í Chicago

Chicago er á hraðri uppleið sem áfangastaður fyrir matgæðinga. Sælkera mun reka í rogastans yfir fjölda verðlaunaðra veitingastaða í borginni og fjölþjóðlegu úrvali fyrir bragðlaukana.

Líttu við á Green City Market til að fá sýnikennslu í matagerð frá stærstu nöfnunum í veitingageiranum eða leggðu leið þína inn í Wicker Park til að kanna nýja og umtalaða staði.

Ertu í leit að einhverju afslappaðra? Kannski er lautarferð í Millenium Park málið. Ef þú hefur heppnina með þér gæti þú jafnvel hitt á tónleika undir berum himni. Pylsa og bjór er annar klassískur valkostur. Sú tvenna vekur iðulegu lukku meðal eldheitra hafnarboltaáhangenda sem safnast saman við Wrigley Field.

Og svo er það einkennisréttur borgarinnar: djúpu flatbökurnar, deep-dish pizza, sem eru með þykkan og háan botn.

Verslað í Chicago

Ef þú ætlar í verslunarferð liggur beint við að hefja hana á svæðinu sem kallað er Magnificent Mile.

Svæðið nær yfir næstum allt Michigan Avenue, yfir 13 húsaraðir milli Chicago River og Oak Street. Hér finnur þú fjölda verslunarmiðstöðva, tískuvöruverslana, gallería, kaffihúsa og veitingastaða. Hér er línan lögð þegar kemur að stíl borgarbúa.

Ef ofgnótt Magnificent Mile hljómar eins og full mikið fyrir þinn smekk, geturðu leitað á aðra hæglátari markaðir og verslunarsvæði í borginni.

Hér má nefna Randolph Street Market sem minnir um margt á Portobello Market í London. Þar er t.d. gott úrval af antíkmunm og vintage fatnaði.