Flug til Dublin með Icelandair, verð frá 30.945 kr.*

Dublin í hnotskurn

Dublinarbúar hafa getið sér góðan orðstír sem bráðfyndnir og hlýlegir gestgjafar og barirnir, tónlistin og frásagnarlistin hafa sama gáskafulla og glaðlega viðmótið. Mörg minni úr sögu Írlands bergmála í sögufrægum byggingum borgarinnar: glæsilegum dómkirkjum, alræmdum fangelsum, verksmiðjum Guinness-fabrikunnar.

Vertu viss um að leggja leið þína inn á sögufrægt háskólasvæði Trinity College. Þar er að finna hina heimsfrægu Keltabók (e. The Book of Kells). Þetta listilega myndskreytta guðspjallahandrit er ævafornt, en það var að líkindum búið til við upphaf níundu aldar.

Áhugafólk um írskar bókmenntir getur fetað í fótspor stórskáldanna Joyce, Becket og Wilde. Listunnendur hafa úr fjölda safna og gallería að velja og allir geta notið sín í göngutúr um gróðursæl stræti miðborgarinnar.

Tilvalið er að skreppa í stutta ferð út fyrir borgarmörkin til fiskiþorpsins Howth, sem liggur í einungis 15 km fjarlægð frá borginni. Virtu fyrir þér aðra hlið á Írlandi og sporðrenndu dýrindis fiskrétti í hádegisverð. Eins er vert að nefna Glendalough, rúmlega 50 km sunnan af borginni. Þar gefur að líta klausturrústir í ægifögru umhverfi.

Með Icelandair VITA er hægt að bóka pakkaferð til Dublin.

Etið og drukkið að Dyflinnarsið

Gæddu þér á einhverjum af hinum fagurlega nefndu þjóðarréttum Íra: boxty, colcannon eða champ. Kartöflur eru afar vinsæl matvara og þær eru framreiddar á fjömarga vegu, en þú finnur einnig fjölda staða sem bjóða upp á kjöt og sjávarfang í hæsta gæðaflokki.

Þú verður að prófa írska sódabrauðið og ostana. Þegar hungrið kallar finnur þú svo fjölmarga góða veitingastaði á Temple Bar, líflegu svæði við ána Liffey í miðborg Dublin, og fínni staði við Merrion-torgið, í hliðargötunum við Grafton Street og í Ranelagh-hverfinu í suðurhluta borgarinnar.

Írsku pöbbarnir eru svo kapítuli út af fyrir sig og óneitanlega snar þáttur í menningarlífi borgarinnar.

Margir pöbbar bjóða upp á eitthvað matarkyns sem skola má niður með Guinness og kannski staupi af írsku viskíi. Krárnar eru í þokkabót oft fagurlega skreyttar og bjóða margar hverjar upp á lifandi tónlist að hætti heimamanna. Sláinte!

Besti tíminn til að fljúga til Dublin

Margir velja að ferðast til Dublin yfir sumarmánuðina. Þá er mikið við að vera í menningarlífinu og hæg heimatökin að spássera um alla helstu merkisstaði borgarinnar.

Ef þú ert á höttunum eftir ódýrari gistingu og minni túrisma, er um að gera að plana ferðalag utan sumarmánuðanna.

Veturinn í Dublin getur verið verulega harður og kaldur, því er ráðlegt að pakka nóg af hlýjum fötum ef þú stefnir á heimsókn frá nóvember og fram í febrúar.

Vorið og haustið eru sennilega besti tíminn ef þú vilt hitta á Dublin utan háannatíma túrismans. Veður eru að öllu jöfnu titlölulega mild og ferðamennirnir færri - að Degi heilags Patreks í mars undanskildum.

Samgöngur í Dublin

Dublin er tilölulega lítil, af höfuðborg að vera, svo að það er hægt um vik að komast leiðar sinnar fótgangandi eða á hjóli.

Almenningssamgöngukerfi Dublin er engu að síður gott og samanstendur af Luas (sporvögnum), DART (Dublin Area Rapid Transit), lestum og stræstisvögnum. Strætóinn er að mörgu leyti hentugastur því hann skilar þér yfirleitt alla leið að helstu áfangastöðum ferðamannsins.

Leigubílar standa líka til boða en eins og víðast hvar annarsstaðar, er þetta dýrari samgöngumáti.

Ef þú hyggur á ferðalög út til sveita á Eyjunni grænu, liggur beint við að taka bíl á leigu. Utan við miðborgina bíður þín fjölbreytt og fögur náttúran í öllu sínu veldi: eiturgrænir hagar og hæðir, kastalar og klaustur, ægifögur strandlengjan.

Og hvernig hljómar svolítil sveitaferð til staða sem hljóma eins og titlar á dægurlögum: the Ring of Kerry, the Dingle Peninsula, Kilkenny og Limerick?