Flug til Tenerife með Icelandair, verð frá 52.135 kr.*

Tenerife í hnotskurn

Ef til er einhver uppskrift að fullkomnu fjölskyldufríi, samanstendur hún sennilega af þægilegu loftslagi, öruggu umhverfi, sól, sandi og auðveldu aðgengi að öllum helstu nauðsynjum. Með öðrum orðum, öllu því sem Tenerife hefur upp á að bjóða.

Tenerife er stærst Kanaríeyjanna. Fyrir utan afslöppun og batteríáfyllingu, stendur líka til boða fjölbreytt afþreying fyrir alla aldurshópa. Tækifæri til útivistar og afþreyingar eru óþrjótandi.

Hvort sem þú ert á höttunum eftir næturlífi, eldfjallaklifri eða afslöppun, er Tenerife áfangastaður fyrir þig.

Ef þú vilt enn meiri þægindi og dekur þá er Icelandair VITA með pakkaferðir til Tenerife þar sem gæði og góð þjónusta eru í fyrirrúmi.

Samgöngur á Tenerife

Margir ferðalangar kjósa að taka leigubíl eða rútu frá flugvellinum á gististaðinn og ganga síðan þaðan í búðir og veitingahús og út til strandarinnar.

Ef þú dvelur við suðurströndina má almennt gera ráð fyrir að allt það helsta sé í göngufæri, en það er auðvelt að ná í leigubíl og rútuferðir standa til boða milli flestra borga og bæja á eyjunni.

Þau sem vilja leita út fyrir suðurströndina, kanna náttúru og mannlíf annarsstaðar á eyjunni, gætu hugleitt að taka bíl á leigu en rútur ganga líka á marga vinsælustu ferðamannastaðina á Tenerife.

Hvað er hægt að gera á Tenerife?

Vinsælustu ferðamannastaðina er að finna á hinum sólríka suðurhluta eyjarinnar. Í ferðamannabænum Los Cristianos úir allt og grúir af börum og veitingastöðum og hér er fjölbreytt framboð á hótelgistingu.

Það er ekki alveg laust við að andi sjávarþorpsins sem var hér áður svífi enn yfir vötnum á sumum götum bæjarins. Ströndin ekki langt undan, með aðstöðu til afslöppunar og íþróttaiðkunar af ýmsu tagi.

Spölkorn frá Los Cristianos má svo finna ekki síður vinsælan áfangastað ferðamanna, Playa de las Americas, eða Amerísku ströndina, en þar má finna úrval veitingastaða, verslana og skemmtana fyrir alla aldurshópa.

Það liggur fyrir að flestir þeirra sem ferðast til Tenerife vilji taka frá einhvern hluta frísins til að slaka á og njóta lífsins á sólríkri suðurhafsströnd. En svo má líka bregða sér í bátsferð út á hafið bláa hafið, fara í töfrandi köfunar- og kajakleiðangur, eða leggja sér leið á eina af hinum fjölmörgu víngerðum eyjanna og dreypa á hreinræktuðu Kanaríeyjavíni.

Dagsferðir á Tenerife

Þau sem vilja komast örlítið út fyrir miðpunkt ferðamennskunnar, geta lagt leið sína til þorpanna Puerto de Santiago og Los Gigantes á vesturhluta eyjarinnar.

Hér má eins og annarsstaðar á Tenerife finna fagrar strandir, en eitt helsta aðdráttarafl svæðisins er klettabeltið Acantilados de los Gigantes.

Á íslensku gæti nafnið útlagst sem Tröllhamrarnir. Þetta eru mörghundruð metra háir og tignarlegir klettaveggir. Þeir teygja sig allt að 500 metrum yfir sjávarmál.

Heimsæktu norðurhluta eyjarinnar

Ævintýragjarnir ferðalangar gætu lagt leið sína til noðurhluta eyjarinnar og kannað staði sem liggja aðeins út fyrir hringamiðju túrismans.

Óhætt er að mæla með gönguferð um þorpið San Cristóbal de la Laguna, sem er eins konar þungamiðja sögu og menningar svæðisins. Sömuleiðis gefst ferðalöngum á norðuhluta Tenerife færi á að heimsækja sjálfa höfuðborgina, Santa Cruz de Tenerife og hið glæsilega torg Plaza de España.

Tenerife er ekki síðri áfangastaður fyrir þau sem ástunda göngur. Ein magnþrugnasta leiðin á norðurhluta eyjarinnar liggur frá Santiago del Teide til Masca.

Og svo má finna afslappaðri afþreyingu líka, til dæmis heimsókn á eina af fjölmörgum bananaplantekurm eyjarinnar til að fræðast um þennan mikilvæga landbúnað og kannski fá smakk af vörunni.

Pico del Teide

Það má segja að einn staður á Tenerife standi upp úr, í bókstaflegri merkingu. Eldfjallið Pico del Teide gnæfir yfir Kanaríeyjum og raunar öllum umdæmum Spánar.

Fjallið er 3718 metra hátt og staðsett í El Teide þjóðgarðinum. Fjallið og svæðið í kring er tilvalið fyrir göngur og til að fá gott útsýni yfir eyjuna.

Þeir sem hafa í hyggju að fara á tveimur jafnfljótum alla leið upp á topp eiga nokkuð erfiða fimm tíma göngu fyrir höndum, en svo má líka fara upp á topp með kláfferjunni.

Aðrir geta bara virt þennan glæsilega tind fyrir sér af láglendinu og notið allrar þeirrar náttúrufegurðar sem El Teide þjóðgarðurinn státar af.