Flug til Vancouver með Icelandair, verð frá 83.235 kr.*

Besti tíminn til að heimsækja Vancouver

Vinalega borgin Vancouver heillar og kætir allt árið um kring.

Sumarið er vinsælasti tíminn í Vancouver, þá lífga hátíðir og hlýtt veður upp á bæjarlífið og fólk nýtur lífsins utandyra. English Bay er vinsæll áfangastaður þeirra sem sækjast eftir afþreyingu í vatni: kajakferðum, sundi og siglingum. Svo er líka hægt að hafa það náðugt á ströndinni!

Yfir köldustu mánuðina frá desember fram í mars hópast skíða- og snjóbrettafólk til Vancouver, en stefnan er ekki tekin á borgina sjálfa heldur skíðasvæðið Whistler, sem liggur í grennd við borgina. Þannig er vetrartíminn kjörinn fyrir íþróttaiðkendur, en kannski síður fyrir þau sem vilja verja tíma sínum í borginni í skoðunarferðir utandyra.

Ef þú vilt heimsækja borgina þegar færra er um ferðamenn, en óneitanlega líka lægri hiti, mælum við með tímabilunum frá mars fram í maí og september út nóvember. Á þessum tíma er flugverðið almennt lægst.

Með Icelandair VITA er hægt að bóka pakkaferð til Vancouver.

Samgöngur í og handan Vancouver

Í Vancouver er fyrirtaks almenningssamgöngukerfi sem gengur undir nafninu Translink. Það samanstendur af lestum, strætisvögnum og bátum. Canada Line og SkyTrain Rapid Transit eru vinsælustu almenningssamgöngurnar.

Nóg er af leigubílum og sömuleiðis er auðvelt að verða sér úti um bílaleigubíl í borginni.

Að því sögðu, er í raun lítið mál að komast leiðar sinnar fótgangandi í Vancouver, en hjólaleiðir þræða sig um alla borg og auðvelt er að ná í deilihjól.

Taktu ferjuna til Vancouver Island og heimsæktu höfuðborg héraðsins, hina glæsilegu Victoriu. Kannski nærðu hvalaskoðunarferð í leiðinni.

Hraðbraut 99, öðru nafni Sea to Sky Highway, liggur milli Vancouver og Whistler. Þú gætir ekki beðið um glæsilegri akstursleið.

Ef asíska matargerðin hefur fangað huga þinn er tilvalið að fara frá Vancouver til Richmond en þar er stórt samfélag brottfluttra Asíubúa og ósviknir næturmarkaðir.

Hvað er við að vera í Vancouver?

Oft er talað um hina vinalegu Vancouver sem eina bestu borg í heimi til að búa í – ósnortin náttúran er skammt undan og borgin iðar af menningarlífi. Rétt norðan af miðbænum finnur þú Stanley Park, víðfemt útisvistarsvæði sem býður upp á langa og töfrandi gönguleið meðfram sjónum, skóga, útsýnisstaði, strandir, vötn og leiksvæði fyrir börn.

Fleiri gullmolar bíða í nágrenni Vancouver. Leggðu leið þína í Capilano Suspension Bridge Park á norðurströndinni. Útsýnið frá hengibrúnum er ægifagurt og hæðin yfir sjávarmáli skapar vissa spennu!

Svo má líka halda upp til fjalla: Grouse Mountain býður upp á fjör og fjallaloft allan ársins hring. Það er erfitt að standast freistingu hinnar margrómuðu skíðaparadísar Whistler, en hún er í 120 km fjarlægð frá Vancouver. Þorpið er fallegt undir snæviþaktri hulu að vetri til og er jafn vinsælt að sumri til fyrir gönguferðir og fjallareiðhjólaferðir.

Það er ekkert minna um að vera innandyra í þessari borg, en þar ber sérstaklega að nefna Vancouver Art Gallery. Og ekki missa af tækifærinu til að ganga um hið sögulega Gastown-hverfi.

Alþjóðleg matargerð og asískt góðgæti

Vancouver hefur lengi verið fjölþjóðleg borg og oft er sagt að besta asíska matargerð Norður-Ameríku sé þar á boðstólum. Þetta er sterk fullyrðing en mikill fjöldi fyrsta flokks veitingastaða, sem bjóða allan bragðskala Austurlanda fjær, veitir henni nokkurn trúverðugleika.

Gönguferð um Chinatown á eftir að vekja matarlystina en í raun er gnægt af góðum veitingastöðum um alla borg og öll matarflóra heimsins undir.

Matarvagnar, matarhátíðir, veitingastaðir sem bjóða afurðir beint frá býli, ferskt sjávarfang, kraftbjór og bruggverksmiðjur, allt er þetta innan seilingar.

Ef þetta vekur áhuga þinn, áttu líka eftir að gleðjast yfir hinum einstaka Grandville Island Public Market, en þar getur þú sest niður með nesti og farið í lautarferð.